Омодагии дастаи мунтахаби Тоҷикистон ба нахустин бозӣ таҳти роҳбарии мутахассиси македонӣ Игор Ангеловский ба марҳилаи ниҳоӣ расид.
Имрӯз, 3 июн даста тамрини охирини худро дар Варзишгоҳи марказии Ҳисор баргузор кард. Пагоҳ мунтахаб ба шаҳри Турсунзода сафар карда, дар варзишгоҳи «ТАЛКО-Арена» машқҳои пеш аз бозиро анҷом медиҳад. Тамринҳои имрӯза бештар хусусияти тактикӣ дошта, як соат идома кард.
Ситоди мураббиён ба ҳамдигарфаҳмии бозигарон миёни хатҳо, ташкили амалҳои даставӣ ва такмили нақшаҳои тактикӣ диққати махсус дод.
Ёдовар мешавем, ки вохӯрии дӯстонаи якум миёни дастаҳои Тоҷикистон ва Ҳиндустон рӯзи 5 июн дар варзишгоҳи «ТАЛКО-Арена» баргузор шуда, соати 20:00 оғоз мегардад.