Сармураббии мунтахаби духтаронаи Тоҷикистон (U-15) Фарҳод Холбеков дар бораи аҳамияти чемпионати Ассотсиатсияи футболи Осиёи Марказӣ барои дастааш сухан гуфт. Дар мусобиқаи CAFA-2022, ки дар Ҳисор баргузор мешавад, мунтахаби духтаронаи то 15-солаи Тоҷикистон бо тимҳои Ӯзбекистон (21 октябр) ва Эрон (25 октябр) бозӣ мекунад.
Фарҳод ХОЛБЕКОВ, сармураббии мунтахаби духтаронаи Тоҷикистон (U-15):
– Бешубҳа, мусобиқаи CAFA, ки дар доираи он мо бо тимҳои миллии Ӯзбекистон ва Эрон бозӣ хоҳем кард, бароямон як имтиҳони хубе хоҳад буд. Барои духтарони мо ин аввалин мусобиқаи байналмилалӣ дар фаъолияти футболии онҳост. Мо кӯшиш мекунем, ки бозии хуб нишон диҳем. Вазифаи асосии мо омода шудан ба даври аввали мусобиқаи интихобии Ҷоми Осиё-2024, ки моҳи апрели соли оянда дар Душанбе баргузор мешавад, ба ҳисоб меравад.