Ҳайати доварони Тоҷикистон бозии дӯстонаи дастаҳои мунтахаби Непал ва Афғонистонро, ки рӯзи 16 ноябр дар Душанбе баргузор мешавад, доварӣ мекунад.
Довари ФИФА Сайёдҷон Зайниддинови 37-сола довари марказии рақобат хоҳад буд. Ёварони довари ФИФА Хусрави Сиддиқзод ва Фарҳод Куралов дар хатҳо ба ӯ кумак мекунанд. Довари ФИФА Абдулло Давлатов довари эҳтиётӣ таъйин гардид. Рустам Абдуллоев кори ҳайати доваронро назорат намуда, Ҷовидон Ҳасанов комиссари бозӣ интихоб шуд.
Қобили зикр аст, ки бозии дӯстона миёни дастаҳои мунтахаби Непал ва Афғонистон рӯзи 16 ноябр дар Варзишгоҳи марказии Душанбе баргузор шуда, соати 18:00 оғоз мешавад.