Дастаи наврасони Тоҷикистон (U-17) таҳти роҳбарии Раҳматулло Фузайлов бозии ниҳоии худро дар Ҷоми Осиё-2023 дар Тайланд анҷом дод.
Дар даври сеюми марҳилаи гурӯҳии мусобиқоти қаҳрамонии Осиё дар чаҳоргонаи «С» мунтахаби наврасони мо бо тими Австралия вохӯрд. Барои роҳ ёфтан ба даври чорякниҳоӣ шогирдони Раҳматулло Фузайлов бояд дар бозии имрӯза пирӯзӣ мекарданд. Наврасони Тоҷикистон назди дарвозаи дастаи Австралия бисёр имкониятҳои голзанӣ созмон медоданд, вале мутаассифона онҳоро амалӣ карда натавонистанд. Дар нимаи дуюм ба тими Австралия муяссар шуд, ки ду маротиба хати ҳимояи тими Тоҷикистонро шикаста, бо ҳисоби 2:0 пирӯз шавад.
Дар бозии дигар мунтахаби Арабистони Саудӣ бар тими Чин пирӯз шуд – 3:0.
Ҳамин тариқ, Арабистони Саудӣ дар се бозӣ 9 имтиёз ба даст оварда, дар гурӯҳи «С» мақоми аввалро касб кард. Австралия бо шаш имтиёз дар ҷои дуюм қарор гирифт. Мунтахаби Тоҷикистон як хол ба даст оварда, дар зинаи сеюми ҷадвал ҷойгир шуд. Дастаи Чин мавқеи охиринро касб кард (1 хол).
Ҷоми Осиё-2023 байни дастаҳои наврасон (U-17)
Гурӯҳи «С». Даври 3
ТОҶИКИСТОН – Австралия – 0:2
Голҳо: Даниэл Бенни, 64 (0:1). Натан Аманатидис, 90+9 (0:2).
Тоҷикистон: Сунатулло Исмоилов, Баракатулло Нигматуллозода, Шеравган Саидов, Амири Фарҳод, Меҳрубон Ҳамидов (Ҳоҷӣ Абуманон, 58), Билол Бобоев (Ориёнмеҳри Нуриддин, 68), Юнус Исматуллоев (Рустам Камолов, 68), Ҷовидон Хушвахтов, Абубакр Сулаймонов Шаҳбон Наимов, Раббонӣ Камолов (Муҳаммадҷони Тоҳир, 86).
22 июн. Бангкок. Варзишгоҳи Раҷамангала. 128 тамошобин.
Арабистони Саудӣ – Чин – 3:0