Гурӯҳи доварони Тоҷикистон бозиҳои марҳилаи гурӯҳии Лигаи қаҳрамонҳои дуюми КФО-2024/25-ро ҳакамӣ менамоянд.
Довари ФИФА Насрулло Кабиров вохӯрии Лигаи қаҳрамонҳои дуюми КФО-2024/25 дар гурӯҳи «G» миёни бошгоҳҳои «Нам Дин» (Ветнам) ва «Тампинес Роверс» (Сингапур)-ро, ки 6 ноябр дар Ветнам баргузор мешавад, доварӣ мекунад. Ба Кабиров ёварони довари ФИФА Акмал Бӯриев ва Хусрави Сиддиқзод кӯмак мекунанд. Довари чаҳорум Медербек Тайчиев аз Қирғизистон таъйин гардид.
Ҳамчунин ҳайати доварони Насрулло Кабиров бозии даври панҷуми марҳилаи гурӯҳии Лигаи қаҳрамонҳои дуюми Осиё-2024/25 дар гурӯҳи «D» миёни дастаҳои «Ал-Ҳусейн»-и Урдун ва «Шабоб Ал-Аҳли» (АМА)-ро доварӣ мекунад. Ин вохӯрӣ 27 ноябр дар Аммон баргузор мешавад. Ёварони Кабиров Акмал Бӯриев ва Хусрави Сиддиқзод хоҳанд буд. Довари ФИФА Абдулло Давлатов довари эҳтиётӣ муқаррар гардид.
Дастаи дигари доварон аз Тоҷикистон таҳти роҳбарии довари ФИФА Гулмуроди Саъдулло рӯзи 27 ноябр дар шаҳри Бурайдаи Арабистони Саудӣ дар бозии Лигаи қаҳрамонҳои дуюми Осиё-2024/25 байни бошгоҳҳои «Ал-Таавун» (Арабистони Саудӣ) ва «Ал-Халдия» (Баҳрайн) кор мекунанд. Ёварони Гулмуроди Саъдулло Ҳасан Каримов ва Вафо Қараев мебошанд. Довари ФИФА Сайёдҷон Зайниддинов довари эҳтиётӣ таъйин гардид.