Дар остонаи оғози мусобиқоти Ҷоми Осиё-2023 миёни дастаҳои мунтахаби наврасони то 17-сола сармураббии мунтахаби Тоҷикистон Раҳматулло Фузайлов дар нишасти хабарӣ ширкат кард.
Дар Ҷоми Осиё-2023 миёни наврасон, ки аз 15 июн то 2 июл дар Таиланд баргузор мешавад, мунтахаби Тоҷикистон дар гурӯҳи «С» бо дастаҳои Чин (16 июн), Арабистони Саудӣ (19 июн) ва Австралия (22 июн) бозӣ мекунад.
«Мо дар гурӯҳи хеле душвор ҳастем ва роҳ ёфтан ба даври баъдӣ осон нахоҳад буд. Аммо рақибони худро хуб омӯхтем ва аз бозӣ ба бозӣ омодагӣ мебинем. Дастаи мо чанд марҳилаи омодагиро ба Ҷоми Осиё-2023 анҷом дод. Ҷамъомади ниҳоии тамриниро дар Бангкок гузаронидем ва бачаҳо аллакай давраи мутобиқшавиро сипарӣ карданд. Даста ба бозиҳои дарпешистода омода аст. Вазифаи аввалиндараҷаи мо баромадан аз гурӯҳ аст. Саъй мекунем, ки ин вазифаро иҷро кунем», – гуфт сармураббии мунтахаби наврасони Тоҷикистон (U-17) Раҳматулло Фузайлов.