Дар бозии даври чоруми чемпионати Ассотсиатсияи футболи Осиёи Марказӣ миёни дастаҳои ҷавонони то 20-сола тими миллии наврасони Тоҷикистон (U-17) бо дастаи Ӯзбекистон рақобаташро мусовӣ – 1:1 кард.
Ҳисобро дар дақиқаи 89-ум ҳамлагари мунтахаби наврасони Тоҷикистон Беҳрӯз Хуҷаев боз кард. Шогирдони Раҳматулло Фузайлов дар дақиқаҳои иловагӣ пирӯзиро аз даст доданд. Довари марказӣ Араб Бараги Амир аз Эрон ба дарвозаи тими мо пеналти таъйин кард, ки дар натиҷа дастаи Ӯзбекистон таносубро баробар сохт – 1:1. Мухаммадалӣ Уринбоев пеналтиро ба гол табдил дод.
Дар вохӯрии дигари давр тими Эрон бар дастаи Туркманистон бо ҳисоби 3:0 пирӯз шуд. Дар ин бозӣ ба бозигари дастаи Туркманистон Қурбонмуҳаммад Есенов ва сармураббии даста Аҳмад Оғомуродов корти сурх нишон дода шуд.
Як давр пеш аз анҷоми чемпионати CAFA-2023 байни дастаҳои ҷавонон (U-20) мунтахаби Ӯзбекистон бо 7 имтиёз дар садри ҷадвал қарор дорад. Дастаи Эрон 6 имтиёз касб намудааст. Мунтахаби Тоҷикистон бо дарёфти 5 имтиёз мақоми сеюмро ишғол мекунад.
Бозиҳои даври ниҳоии чемпионати CAFA-2023 рӯзи 28 май баргузор мешаванд. Дар варзишгоҳи КМВА-и Душанбе соати 10:30 вохӯрии дастаҳои Афғонистон ва Ӯзбекистон оғоз мешавад. Бегоҳӣ дар варзишгоҳи «ТАЛКО-Арена»-и шаҳри Турсунзода бозӣ миёни дастаҳои Тоҷикистону Эрон баргузор мегардад. Оғози ин рақобат соати 17:00 дар назар аст.
Чемпионати CAFA-2023 байни дастаҳои ҷавонон (U-20)
Даври 4
Ӯзбекистон – ТОҶИКИСТОН – 1:1
Голҳо: Беҳрӯз Хуҷаев, 89 (0:1). Муҳаммадалӣ Уринбоев, 90+4 – аз пеналти (1:1).
Пеналтиро иҷро карда натавонист: Муҳаммадалӣ Уринбоев (Ӯзбекистон), 43 – дарвозабон.
Аз майдон хориҷ карда шуд: Сунатулло Исмоилов (Тоҷикистон), 90+4 – 2-корти зарди дуюм, Абубакр Сулаймонов (Тоҷикистон) – пас аз анҷоми бозӣ.
26 май. Турсунзода. Варзишгоҳи «ТАЛКО-Арена». 3100 тамошобин.
Эрон – Туркманистон – 3:0
Голҳо: Ризо Мирзоён, 69 (1:0). Ризо Мирзоён, 75 (2:0). Мирмаҳдӣ Маҳдави Аташгоҳ, 82 (3:0).
Аз майдон хориҷ карда шуд: Гурбонмуҳаммад Есенов (Туркманистон), 62, Аҳмад Оғомуродов (сармураббии тими миллии ҷавонони Туркманистон), 65.
26 май. Душанбе. Варзишгоҳи КМВА-и ВМ ҶТ. 220 тамошобин.