Дастаи мунтахаби ҷавонони то синни 19 солаи Тоҷикистон омодагиро ба мусобиқаи байналмилалии «CAFA Cup – U-19» оғоз кард. Мусобиқа бо иштироки дастаҳои мунтахабҳои ҷавонони кишварҳои узви Ассотсиатсияи футболи Осиёи Марказӣ (CAFA) аз 6 то 9 август дар пойтахти Ҷумҳурии Узбекистон шаҳри Тошканд мегузарад.
Имрӯз, 25 июл, мунтахаби ҷавонони Тоҷикистон омодагиро ҷиҳати иштирок дар ин мусобиқа бо роҳбарии сармураббӣ Виталий Левченко дар шаҳри гулистони вилояти Суғд оғоз намуд. Виталий Левченко барои иштирок дар ин ҷамъомади омӯзишию машқии даста 27 бозигар – 3 дарвозабон, 8 муҳофиз, 12 ниммуҳофиз ва 4 ҳамлагарро даъват кардаст, ки аз ин шумора 18 бозигар ба дархостномаи иштирокчигии мусобиқаи байналмилалӣ дар Тошканд шомил мешавад.
Мунтахаби ҷавонони Тоҷикистон дар гурӯҳи «В» муқобили ҳамсолони худ аз Туркманистон (6 август) ва Эрон (7 август) бозӣ мекунад. Дар гурӯҳи «А» бошад мунтахабҳои ҷавонони Узбекистон, Афғонистон ва Қирғизистон баромад хоҳанд кард.
Аз рӯи ҷамъбасти натоиҷи бозиҳо ғолибони гурӯҳ дар бозии финалӣ вомехӯранд. Дастаҳои ҷои дуюми гурӯҳҳо барои медалҳои биринҷии мусобиқа бо ҳам вомехӯранд. Дастаҳои зинаҳои охирони гурӯҳҳо бошанд барои мақоми таскинбахши панҷум бо ҳамдигар рақобат мекунанд. Бозиҳои мусобиқаи байналмилалии «CAFA Cup – U-19» барои кишварҳои иштирокчии Ассотсиатсияи футболи Осиёи Марказӣ дар варзишгоҳҳои «Жар» ва «Пахтакор» дар Тошканд баргузор хоҳанд шуд.
Ҳайати васеи мунтахаби ҷавонони Тоҷикистон (U-19):
Дарвозабонҳо: Беҳрӯз Хайриев, Шаҳром Исмоилов («Барқчӣ»), Фатҳулло Бобоев («Ҳосилот»),
Муҳофизон: Доробҷон Эргашев («Регар-ТадАЗ»), Табрези Давлатмир («Истиқлол»), Қувватбек Равшанбеков, Алишери Ҳотам, Зиёвуддин Фузайлов, Ҳусейн Нурматов, Зоир Ҷурабоев (ҳама аз «Барқчӣ»), Азимҷон Раҳмонов («Вахш»),
Ниммуҳофизон: Хоҷибой Зиёев («Хуҷанд»), Худойдод Узоков («Вахш»), Муҳсинҷон Парпиев («Хайр»), Эҳсони Панҷшанбе, Шериддин Бобоев (ҳарду аз «Истиқлол»), Муҳаммадҷон Шарипов, Кароматулло Саидов, Отабек Каримов, Ҳокимҷон Ҳасанов, Мунир Давлатбеков, Муҳаммадҷони Ҳасан, Нумон Зокиров (ҳама аз «Барқчӣ»);
Ҳамлагарон: Нуриддин Ҳамроқулов, Амирҷон Сафаров, Азиз Бегов («Барқчӣ»), Рустам Толибов (КМВА «Помир»).
Тақвими мусобиқа:
Даври 1-ум
6 август (шанбе)
16:00 – Узбекистон – Қирғизистон. Варзишгоҳи «Жар»
18:00 – ТОҶИКИСТОН – Туркманистон. Варзишгоҳи «Пахтакор»
Даври 2-юм
7 август (якшанбе)
16:00 – Афғонистон – Узбекистон. Варзишгоҳи «Жар»
18:00 – Эрон – ТОҶИКИСТОН. Варзишгоҳи «Пахтакор»
Даври 3-юм
8 август (душанбе)
16:00 – Қирғизистон – Афғонистон. Варзишгоҳи «Жар»
18:00 – Туркманистон – Эрон. Варзишгоҳи «Пахтакор»
9 август (сешанбе)
Бозӣ барои ҷои 5-ум
11:00 – А3 – В3. Варзишгоҳи «Жар»
Бозӣ барои ҷои 3-юм
16:00 – А2 – В2. Варзишгоҳи «Жар»
Финал
18:00 – А1 – В1. Варзишгоҳи «Пахтакор»