Барандаи медали биринҷии мусобиқоти қаҳрамонии Тоҷикистон-2022 бошгоҳи футболи «Хуҷанд» дар марҳилаи плей-оффи Ҷоми КФО-2023/24 аз тими «Марв»-и Туркманистон бо ҳисоби 1:2 шикаст хӯрд ва баромади худро дар мусобиқа ба анҷом расонд.
Ин вохӯрӣ 22 август дар варзишгоҳи «20-солагии Истиқлолияти Тоҷикистон» воқеъ дар шаҳри Хуҷанд дар ҳузури 4500 тамошобин баргузор шуд. Вақти асосии бозӣ мусовӣ – 1:1 ба поён расид. Мурат Якшиев дар дақиқаи 54-ум ҳисобро боз кард. Ҳимоятгари «Хуҷанд» Парвиз Боқиев, ки дар нимаи дуюм аз ҳайати захиравӣ ба майдон баромад, дар дақиқаи 79-уми вохӯрӣ ҳисобро баробар кард. Футболбозони туркман дар дақиқаи 114-ум голи ғалабаоварро заданд. Мурат Овезмуродов ба задани гол даст ёфт. Дар натиҷа бо ҳисоби 1:2 «Хуҷанд» дар майдони худ ба шикаст дучор шуд ва ба баромади худ дар Ҷоми КФО-2023/24 нуқта гузошт.
Дар марҳилаи гурӯҳии Ҷоми КФО-2023/24 дар минтақаи марказӣ бошгоҳҳои «Равшан» (Тоҷикистон), «Алтин Асир», «Марв» (ҳарду аз Туркманистон) ва «Абдиш-Ата» (Қирғизистон) ҳунарнамоӣ мекунанд.
🏆 Ҷоми КФО-2023/24
🔷 Минтақаи марказӣ. Даври плей-офф
🇹🇯 «ХУҶАНД» (ТОҶИКИСТОН) – 🇹🇲 «Марв» (Туркманистон) – 1:2
⚽️ Голҳо: Мурат Якшиев, 54 (0:1). Парвиз Боқиев, 79 (1:1). Мурат Овезмуродов, 114 (1:2).
♦️ Аз майдон ронда шуд: Фирдавс Абдусалимов («Хуҷанд»), 112 – корти зарди дуюм.
🏟 22 август. Хуҷанд. Варзишгоҳи «20-солагии Истиқлолияти Тоҷикистон». 4500 тамошобин.