Дастаи мунтахаби Тоҷикистон дар Дубай ҷамъомади дуҳафтаинаи таълимиро оғоз кард, ки ҳадафи он омодагии даста ба марҳилаи интихобии Ҷоми Осиё-2023 мебошад.
Нахустин тамрини тими миллии Тоҷикистон дар Дубай хусусияти барқарорсозӣ дошт. Ҳоло дар ҳайати тими миллӣ аз 26 бозигари даъватшуда 15 бозигар қарор дорад. Легионерҳо ба тими миллии Тоҷикистон дар Амороти Муттаҳидаи Араб марҳила ба марҳила шомил мешаванд, зеро чемпионатҳое, ки онҳо дар онҷо бозӣ мекунанд, идома доранд.
Бояд гуфт, ки баъди анҷоми ҷамъомади таълимиву тамринӣ дар Дубай тими миллии Тоҷикистон ба Бишкек рафта, дар марҳилаи интихобии Ҷоми Осиё-2023 дар гурӯҳи “F” се бозӣ анҷом медиҳад. Рақибони тими мо Мянмар (8 июн), Сингапур (11 июн) ва Қирғизистон (14 июн) хоҳанд буд.