Рефери ФИФА Парвиз Муртазоеви душанбегӣ аз санҷиши дуюми рекруторӣ барои шомил шудан ба рӯйхати доварони баргузадаи Конфедератсияи футболи Осиё бомувафақият гузашт.
Доварии Муртазоевро дар санҷиши якуми рекруторӣ Али Аҳмад Ал-Траифи аз Арабистони Саудӣ дар бозии даври шашуми чемпионати мамлакат миёни дастаҳои “Барқи тоҷик” – КМВА “Помир” (0:1) назорат карда буд. Дар санҷиши дуюми рекруторӣ нозири эронӣ Аскари Миладҷерди Ҳусайн кори Парвиз Муртазоевро дар бозии даври 11 чемпионати Тоҷикистон байни “Истиқлол” ва “Хайр” (8:0) санҷиш намуд.
Барои шомил шудан ба рӯйхати доварони баргузидаи КФО довари моро ҳамагӣ як қадами дигар мондаст. Акнун Парвиз Муртазоев дар курси доварони КФО «AFC Development group referees course 2015», ки аз 26 то 30 сентябр дар Куала-Лумпури Малайзия баргузор мешавад иштирок мекунад. Дар ин курс донистани забони англиси ва омодагии ҷисмонии довари тоҷик имтиҳон карда мешавад.
Айни замон аз Тоҷикистон танҳо як нафар ёвари довари ФИФА – Баҳром Саъдуллоев аз Қӯрғонтеппа шомили рӯйхати доварони баргузидаи КФО мебошад.