Рефери ФИФА Насрулло Кабиров аз Норак, довари бозиҳои чемпионати Осиёи Ғарбӣ байни мунтахабҳои ҷавонони зери 23-сола таъин шуд. Барои довари 30-солаи тоҷик, ин нахустин таъинот дар бозиҳои сатҳи байналмилалӣ аст.
Мусобиқа аз 30 сентябр то 14 октябр дар пойтахти давлати Қатар, шаҳри Доха баргузор мешавад. Дар чемпионати якуми Федератсияи футболи Осиёи Ғарбӣ, даҳ дастаи мунтахаби зери 23-сола иштирок хоҳанд кард. Дастаҳо дар марҳилаи пешакӣ ба се гурӯҳ тақсим шуданд. Ба гурӯҳи “А” мунтахабҳои Қатар, Урдун, Фаластин, Яман, ба гурӯҳи “В” Эрон, Арабистони Саудӣ, Баҳрайн ва ба гурӯҳи “С” Умон, Сурия, Имороти Муттаҳидаи Араб шомиланд.
Аз рӯи натиҷаи марҳилаи пешакӣ, ғолибони гурӯҳ ва мунтахаби ҷои думи нишондиҳандаҳояш аз ҳама баланд, ба чорякфинали мусобиқа роҳ меёбанд.