Рефери ФИФА Парвиз Муртазоеви 27-солаи душанбегӣ марҳилаи аввали санҷишро барои шомил шудан ба рӯйхати элитаи доварони Конфедератсияи футболи Осиё мегузарад.
Муртазоевро рекрутори КФО Алӣ Аҳмад Ал-Траифӣ аз Арабистони Саудӣ санҷиш мекунад. Алӣ Аҳмад Ал-Траифӣ бозиҳои марҳилаи ниҳоии ҶҶ-2002-ро доварӣ кардааст. Ӯ ба кори довари душанбегиро дар бозии даври шашуми чеипионати Тоҷикистон байни дастаҳои “Барқи Тоҷик” ва КМВА “Помир”, ки рӯзи якшанбеи 17 май дар Варзишгоҳи марказии ҷумҳуриявӣ доир мешавад, назорат хоҳад кард. Муртазоевро дар ин бозӣ дар канори майдон Хусрави Сиддиқзоди душанбегӣ ва Сафармаҳмад Шоймардонови хуросонӣ кӯмак мекунанд. Вазифаи довари эҳтиётиро дар ин вохӯрӣ Акмал Буриев аз Турсунзода ба зимма дорад.
Ба ғайр аз баҳогузории кори доварӣ дар майдон Муртазоевро зарур аст, ки оиди донистани забони англисӣ, қоидаҳои бозӣ ва таҳлили ҳолатҳои бозӣ санҷиш супорад.
Ҳаминро қайд мекунем, ки барои шомил шудан ба рӯйхати элитаи доварони КФО довари тоҷик Парвиз Муртазоевро зарур аст, ки се марҳилаи рекруториро сипарӣ кунад. Айни ҳол ба рӯйхати элитаи доварони КФО аз Тоҷикистон ёвари довари ФИФА Баҳром Саъдуллоеви қӯрғонтеппагӣ шомил асту халос.