Имрӯз, 29 феврал, дар маҷлисгоҳи Федератсияи футболи Тоҷикистон қуръакашии марҳилаи ниҳоии Ҷоми ФФТ-2016 доир гардид.
Дар марҳилаи финалии имсолаи Ҷоми Федератсияи футболи Тоҷикистон ҳашт даста ширкат мекунанд. Дастаҳои «Хуҷанд» (Хуҷанд), «Саройкамар» (Панҷ), «Истиқлол» ва КМВА «Помир» (ҳар ду аз Душанбе) дар гурӯҳӣ «А», дастаҳои «Регар-ТадАЗ» (Турсунзода), «Хайр» (Ваҳдат), «Қайроққум» (Қайроққум) ва «Вахш» (Қӯрғонтеппа) дар «Б» ҷойгир шуданд.
Дар марҳилаи ниҳоӣ дастаҳо аз рӯи системаи даврӣ дар як қисм бозӣ мекунанд. Аз рӯи натиҷаи ҷамъбаст аз ҳар гурӯҳ ду дастаи пешсаф ба бозиҳои нимниҳоӣ мебароянд.
Дар бозии даври ифтитоҳии мусобиқа барандаи феълии Ҷоми ФФТ «Истиқлол»-и Душанбе бо «Саройкамар»-и Панҷ, ки дар ин сабқат лигаи якуми мамлакатро намояндагӣ дорад, вомехӯрад. Ин бозӣ пагоҳ, 1-уми март соати 16.00 дар Варзишгоҳи марказии ҷумҳуриявӣ доир мегардад.
Дар доираи даври якуми марҳилаи ниҳоии Ҷоми ФФТ, инчунин, «Хуҷанд» бо КМВА «Помир», «Регар-ТадАЗ» бо «Вахш» ва «Хайр» бо «Қайроққум» вомехӯранд. Ин бозиҳо рӯзҳои 2 ва 3 март доир мегарданд.
Тақвими пурраи бозиҳои марҳилаи ниҳои Ҷоми Федератсияи футболи Тоҷикистон баъд аз тасдиқ шуданаш интишор хоҳад шуд.
Ҷоми ФФТ-2016. Марҳилаи ниҳоӣ
Даври 1-ум
1 март (сешанбе)
Оғози бозӣ соати 16:00
«Саройкамар» – «Истиқлол»
Душанбе, Варзишгоҳи марказии ҷумҳуриявӣ