Дар Душанбе 5 декабр аз рӯи ҳисоб 24-умин мусобиқаи ҷумҳуриявӣ оид ба футзал бахшида ба гиромидошти хотираи собиқадори футболи ватанӣ, бозигари собиқи дастаҳои маъруфи «Помир», «Вахш» ва «Ирригатор» Александр Кирсанов оғоз мешавад.
Мусобиқа дар се гурӯҳ доир мегардад. Дар гурӯҳи «Ҳаваскорон» бозигарони серияҳои «А» ва «В»-и лигаи касбии футзали Тоҷикистон ва дигар дастаҳои хоҳишманд, ба ғайр аз бозигарони дастаҳои футболи оливу якуми Лигаи миллии футболи Тоҷикистон-2015 иштирок мекунанд.
Дар гурӯҳи «Оянда» дастаҳои футзали корхонаву муассисаҳо, ташкилотҳои байналмилалӣ, муассисаҳои таълимии оливу махсуси пойтахт ва дастаҳои шӯрои маҳалаҳои шаҳри Душанбе иштирок менамоянд.
Дар гурӯҳи «Ситораҳо» дастаҳои собиқадорони футболи синнашон аз 40-сола боло мусобиқа мекунанд.
Ёдрас мешавем, ки дар сабқатҳои гузаштаи ин мусобиқа ситораҳои футболи тоҷик мисли Владимир Ғуломҳайдаров, Муҳсин Муҳаммадиев, Арсен Аваков, Игор Черевченко, Умед Алидодов, Алиёр Ашурмамадов, Раҳматулло Фузайлов, Тоҳир Муминов, Александр Муканин ва дигарон иштирок намуданд.
Кумитаи тадорукоти мусобиқаи гиромидошти Александр Кирсанов ҳаммаи дастаҳои хоҳишмандро барои иштирок дар сабқат даъват менамояд. Дархостномаву ҳақиаъзогӣ барои иштирок дар мусобиқа то 27 ноябр дар Федератсияи футболи Тоҷикистон қабул карда мешаванд. Қуръакашии мусобиқа рӯзи 2 декабр, соати 10.00 дар маҷлисгоҳи ФФТ баргузор мешавад.
Барои маълумоти иловагӣ метавонед бо телефонҳои 911100006 (Анвар Мирзоев), 911100016 (Эраҷ Носеҳов) ва 911100003 (Алишер Урунов) тамос бигиред.