Дастаи мунтахаби олимпии Тоҷикистон (U-23) таҳти роҳбарии Мубин Эргашев омодагиро ба марҳилаи интихобии Ҷоми Осиё-2024 дар гурӯҳи «I», ки аз 6 то 12 сентябр дар шаҳри Душанбе баргузор мешавад, идома медиҳад.
31-уми август ин даста дар майдони асосии Варзишгоҳи марказии Душанбе тамрини нахустини худро баргузор кард, ки онҷо ивазкунии чамани сунъӣ ба анҷом расид. Чамани синтетикии нави варзишгоҳ ин муосиртарин навъи чаман буда, дар Ҳолланд истеҳсол шудааст.
Сармураббии мунтахаби олимпии Тоҷикистон Мубин Эргашев ҳоло 21 бозигарро дар ихтиёр дорад. Бо оғоз шудани рӯзҳои ФИФА-и моҳи сентябр даста дар ҳайати пурра ҷамъ мешавад.
Бояд гуфт, ки дар маҳилаи интихобии Ҷоми Осиё-2024 мунтахаби олимпии Тоҷикистон (U-23) дар гурӯҳи «I» бо дастаҳои Лаос (9 сентябр) ва Австралия (12 сентябр) рақобат мекунад. Бозиҳо дар Варзишгоҳи марказии Душанбе баргузор мешаванд.