Имрӯз, 22-юми июл дар меҳмонхонаи «Румӣ»-и шаҳри Душанбе маросими қуръакашии 1XBet-Ҷоми Тоҷикистон-2025 баргузор шуд.16 даста рақибони худро дар қисмати асосӣ муайян карданд.
Мубориза барои дарёфти Ҷом дар даври 1/8 ниҳоии Ҷоми Тоҷикистон байни дувоздаҳ бошгоҳи лигаи олӣ ва чаҳор дастаи лигаи якум, ки аз марҳилаи муқаддамотӣ ба қисмати асосӣ баромаданд, оғоз мешавад.
Қуръакашии Ҷоми Тоҷикистон-2025-ро собиқ нимҳимоятгари маъруфи тими миллии Тоҷикистон Ҷамшед Исроилзода баргузор кард.
Бояд гуфт, ки имсол ҳар марҳилаи мусобиқа аз як бозӣ иборат аст. Вохӯрии ниҳоӣ дар варзишгоҳи «20-солагии Истиқлолияти Тоҷикистон»-и шаҳри Хуҷанд доир мешавад.