Федератсияи футболи Тоҷикистон шартномаи ҳамкориро бо ширкати ҷаҳонии «Coca-Cola» тамдид кард.
Маросими имзои қарордод имрӯз, 21 июл дар дафтари Федератсияи футболи Тоҷикистон бо ҳузури намояндагони расонаҳои хабарӣ баргузор шуд.
Аз ҷониби ФФТ қарордодро ноиби президент Дилшод Ҷӯразода ва аз ҷониби ширкати «Coca-Cola» директори генералӣ дар Тоҷикистон Сунай Шанлӣ имзо карданд.
Дилшод Ҷӯразода, ноиби президенти Федератсияи футболи Тоҷикистон:
– Федератсияи футболи Тоҷикистон беш аз шаш сол боз бо ширкати машҳури «Coca-Cola» ҳамкорӣ дорад ва мо шодем, ки ҳамкориҳои мо идома меёбад. Тибқи шартнома дар марҳилаи нави ҳамкорӣ ширкати «Coca-Cola» барои дастгирии футболи мо ҳудуди 3 миллион сомонӣ ҷудо мекунад.
Сунай Шанлӣ, директори генералии «Coca-Cola» дар Тоҷикистон:
– Имрӯз рисолати ман дар Тоҷикистон ба ҳайси директори генералии ширкати «Coca-Cola» ба охир мерасад ва хеле шодам, ки дар рӯзи охирини кориам мо шартномаи шарикиро бо Федератсияи футболи Тоҷикистон тамдид намудем. Итминон дорам, ки ҳамкориҳои дуҷонибаи мутақобилан судманд ба рушди минбаъдаи футбол дар Тоҷикистон мусоидат хоҳанд кард.