Федератсияи байналмилалии футбол (ФИФА) имрӯз, 22 декабр раддабандии ниҳоии дастаҳои миллиро барои соли 2025 нашр кард.
Тибқи рӯйхати навшуда дастаи миллии Тоҷикистон бо 1224.93 хол дар ҷойи 101-ум қарор дорад. Дар байни мунтахабҳои миллии узви Конфедератсияи футболи Осиё Тоҷикистон дар зинаи 17-ум аст. Дар муқоиса бо ҳамин давраи соли гузашта, дастаи мо мавқеи худро беҳтар карда, аз ҷойи 104-ум боло баромад.
Дар соли 2025 тими миллии Тоҷикистон 10 бозӣ анҷом дод, ки шаш ғалаба, ду мусовӣ ва ду бохтро ба қайд гирифт. Пирӯзиҳо бар Тимори Шарқӣ (1:0, 5:0), Камбоҷа (2:1), Афғонистон (2:0) ва Малдив (2:0, 3:0) ба даст оварда шуданд. Мусовиҳо бо Филиппин (2:2) ва Эрон (2:2) сабт шуданд. Дар рақобатҳои бо Беларус (0:5) ва Ҳиндустон (1:2) ба бохт дучор шуданд.
Тими миллии Тоҷикистон бозии расмии навбатии худро 31 марти соли 2026 дар Ҳисор анҷом медиҳад. Ин вохӯрӣ дар даври ниҳоии марҳилаи интихобии Ҷоми Осиё-2027 дар гурӯҳи «А» бар зидди яккачини Филиппин сурат мегирад.