Сармураббии дастаи мунтахаби Тоҷикистон Петр Сегрт бобати бозии даври аввали марҳилаи гурӯҳии Ҷоми Осиё-2023 бо тими миллии Чин, ки 13 январ дар варзишгоҳи Абулло бин Халифаи Доҳа баргузор мешавад, ибрози назар кард.
Петр СЕГРТ, сармураббии тими миллии Тоҷикистон:
– Мунтахаби Тоҷикистон барои аввалин бор дар Ҷоми Осиё ширкат мекунад ва инҷо будан барои мо шарафи бузург аст. Гурӯҳи мо қавист. Қатар, Чин ва Лубнон дастаҳои хубанд, ҳама рақибонро эҳтиром мекунем.
Ҳоло тамоми диққатамонро ба бозии аввал бо тими Чин равона кардаем. Бозии аввал ҳамеша ҳаяҷоновар аст. Чини бузург бо як кишвари хурде мисли Тоҷикистон бозӣ мекунад. Мо мубориза мебарем, дар ҳар як рақобат тамоми нерӯи худро сарф мекунем ва кӯшиш менамоем, ки дар Қатар то ҳадди имкон зиёдтар бимонем.
Пеш аз расидан ба Қатар бо Ҳонконг як бозии санҷишӣ гузаронидем. Чаро мо танҳо як бозӣ кардем? Зеро метарсидем, ки пеш аз Ҷоми Осиё бозигарон маҷруҳ мешаванд. Мутаассифона, дирӯз маълум шуд, ки Амирбек Ҷӯрабоев ба далели ҷароҳат дар Ҷоми Осиё ширкат карда наметавонад. Ин барои дастаи мо талафоти калон аст. Таманно дорам, ки Амирбек зудтар шифо ёбад.