Дастаи мунтахаби бонувони Тоҷикистон (U-17) таҳти роҳбарии Фарҳодҷон Холбеков дар доираи ҷамъомади тамринӣ, ки дар шаҳри Ҷидда ҷараён дорад, бозии дӯстонаи дуюмро анҷом дод.
18 декабр футболбоздухтарони Тоҷикистон боз бо ҳамсолони худ аз Арабистони Саудӣ бозӣ карданд. Ин дафъа дастаи мо бо ҳисоби 1:0 ғолибият ба даст овард. Голи ягонаро дар дақиқаи 82-юм Райҳона Шомуродова ба самар расонд.
Қаблан дар рақобати санҷишии якум хубони футболбози Тоҷикистон бар тими Арабистони Саудӣ бо ҳисоби 2:0 пирӯз шуда буданд.
Қобили зикр аст, ки бозиҳои дӯстона бо тими Арабистони Саудӣ барои мунтахаби бонувони Тоҷикистон (U-17) яке аз марҳилаҳои омодагӣ ба мусобиқаи интихобии Ҷоми Осиё-2026 мебошад, ки аз 9 то 17 октябри соли оянда баргузор мешавад.