Ситоди мураббиёни тими миллии Тоҷикистон таҳти роҳбарии мутахассиси хорватӣ Петр Сегрт ҳайати дастаи мунтахаби кишварро барои ширкат дар мусобиқаи «Ҷоми Мердека-2023», ки дар Малайзия баргузор мешавад, эълон кард.
Ба ҳайати мунтахаби Тоҷикистон 23 бозигар – 3 дарвозабон, 8 ҳимоятгар, 8 нимҳимоятгар ва 4 ҳамлагар шомиланд. Чаҳор бозигари мунтахаби олимпии кишвар (U-23) барои нахустин бор ба тими миллии кишвар даъват шуданд – дарвозабон Сӯҳробхуҷа Юсупов (КМВА), ҳимоятгар Фахриддин Аҳтамов («Хуҷанд»), нимҳимоятгарон Руслан Хайлоев («Тюмен»-и Русия) ва Алишер Шукуров («Куктош»), инчунин ҳимоятгарони мунтахаби наврасони кишвар (U-17) – Диловар Ҷамшедзода ва Баракатулло Нигматуллозода, ки дар «Барқчӣ»-и Ҳисор бозӣ мекунанд.
Ба далели омодагии қаҳрамони Тоҷикистон, бошгоҳи «Истиқлол» ба бозиҳои марҳилаи гурӯҳии Лигаи қаҳрамонҳои Осиё-2023/24 ситоди мураббиёни тими миллӣ бозигарони ин бошгоҳи шаҳри Душанберо дар рӯзҳои ФИФА-и моҳи октябр ба ҳайати мунтахаб даъват накарданд.
Қобили зикр аст, ки дар мусобиқаи «Ҷоми Мердека-2023» мунтахаби Тоҷикистон рӯзи 13 октябр бо тими миллии Фаластин бозӣ мекунад. Дар рақобати дигари даври ниманиҳоӣ тимҳои Малайзия ва Ҳиндустон вомехӯранд.
Ғолибони даври ниманиҳоӣ рӯзи 17 октябр дар бозии ниҳоӣ ба ҳам меоянд ва дастаҳои мағлубшуда барои медалҳои биринҷӣ мубориза мебаранд. Ҳама бозиҳои ин мусобиқа дар Варзишгоҳи миллии Букит Ҷалили Куала-Лумпур баргузор мешаванд.
Ҳайати дастаи мунтахаби Тоҷикистон дар мусобиқаи «Ҷоми Мердека-2023»:
Дарвозабонҳо: Суҳробхуҷа Юсупов (КМВА), Сафармад Ғаффоров («Хатлон»), Далер Баротов («Истаравшан»);
Ҳимоятгарон: Ваҳдат Ҳанонов («Персеполис», Эрон), Зоир Ҷӯрабоев («Нефтчӣ», Ӯзбекистон), Манучеҳр Сафаров («Локомотив», Ӯзбекистон), Далер Имомназаров («Эсхата»), Холмурод Назаров («Равшан»), Фахриддин Аҳтамов («Хуҷанд»), Диловар Ҷамшедзода, Баракатулло Нигматуллозода (ҳарду аз «Барқчӣ»);
Нимҳимоятгарон: Парвизҷон Умарбоев (ССКА-1948, Булғористон), Амирбек Ҷӯрабоев («Кедах», Малайзия), Муҳаммадҷон Раҳимов («Бухоро», Ӯзбекистон), Руслан Хайлоев («Тюмен», Русия), Муродалӣ Ақназаров («Анталяспор», Туркия), Вайсиддин Сафаров (КМВА), Алишер Шукуров («Куктош»), Абубакр Сулаймонов («Барқчӣ»);
Ҳамлагарон: Рустам Соиров («Локомотив», Ӯзбекистон), Шаҳром Самиев («Милсами», Молдова), Нуриддин Ҳамроқулов («Регар-ТадАЗ»), Муҳаммадалӣ Азизбоев («Ҳосилот»).