Капитани тими миллии Тоҷикистон Аҳтам Назаров пас аз бозии аввали марҳилаи интихобии Ҷоми Осиё-2027 бо тими Тимори Шарқӣ (1:0) ба мухлисон муроҷиат кард.
«Ман ба мухлисон муроҷиат мекунам, ба ҳамаи онҳое, ки ба варзишгоҳ омада, мунтахаби Тоҷикистонро дар вохӯриҳо бо дастаҳои мунтахаби Беларус ва Тимори Шарқӣ дастгирӣ карданд. Розӣ ҳастам, ки мо бозиҳои хуб нишон надодем. Аз ин рӯ, аз мухлисон узр мепурсам, мо ҳаққи ҳеҷ гуна баҳонаҷӯйӣ надорем. Мехостам ба мухлисон барои дастгирии ҳамешагиашон миннатдорӣ баён кунам. Назди даста вазифаи ба қисми ниҳоии Ҷоми Осиё-2027 баромадан гузошта шудааст. Мо тамоми кори аз дастамон меомадаро мекунем, то мухлисони худро бо ғалабаҳо шод гардонем. Мо футболбозон барои ҳар он чизе, ки дар майдон рух дод, масъулиятро ба дӯш мегирем. Талош хоҳем кард, ки рушд кунем ва боварии мухлисонро мисли дар бозиҳои Ҷоми Осиё-2023 дар Қатар баргардонем», – гуфт сарвони тими миллии Тоҷикистон Аҳтам Назаров.