Дастаи мунтахаби занонаи футзали Тоҷикистон омодагиҳоро ба мусобиқоти қаҳрамонии Ассотсиатсияи футболи Осиёи Марказӣ, ки аз 9 то 16 феврал дар Душанбе баргузор мешавад, оғоз кард.
Сармураббии нави тими занонаи футзали Тоҷикистон Баҳром Ёрматов ба ҷамъомади тамринӣ, ки як ҳафта идома мекунад, 22 нафар – 3 дарвозабон ва 19 бозигарро даъват кардааст. Ба рӯйхати ниҳоии даста ҷиҳати ширкат дар чемпионати CAFA-2025 14 бозигар шомил карда мешавад.
Дар чемпионати CAFA-2025 оид ба футзал байни занон дастаҳои Тоҷикистон, Эрон, Ӯзбекистон, Қирғизистон ва Туркманистон ширкат мекунанд. Ҳамаи бозиҳои мусобиқа дар Қасри теннис ва маҷмааи варзиши обӣ баргузор мешаванд.